جموں کشمیر میں آیوشمان بھارت صحت اسکیم 10 دن سے بند، معاہدے میں توسیع نہ ہونے پر سہولیات کو بند کیا گیا: ذرائع

سرینگر: آیوشمان بھارت صحت اسکیم کے تحت دی جانی والی مفت طبی سہولیات جموں وکشمیر کے نجی اسپتالوں اور نرسنگ ہومز میں گزشتہ 10 روز سے ٹھپ پڑی ہیں کیونکہ اسکیم کے تحت مفت طبی سہولیات فراہم کرنے والے 93 نجی اور 103 ڈائیلیسز سینٹروں کے معاہدے میں کوئی توسیع عمل میں نہیں لائی گئی۔ 

سن رائز نیوز ایجنسی کی رپورٹ کے مطابق گولڈن کارڈ کے تحت دی جانی والی نجی اسپتالوں میں مفت طبی سہولیات کے معاہدے کی ہر تین سال کے بعد تجدید کرنا ہوتی ہے، جو کہ ابھی نہیں کی گئی ہے۔

واضح رہے کہ 14 مارچ کو نجی اسپتالوں اور سرکار کے درمیان یہ معاہدہ ختم ہوا لیکن 10 روز گزر جانے کے باوجود بھی اس معاہدے کی تجدید نہیں کی گئی ہے جس کے نتیجے میں نجی اسپتالوں نے مفت طبی سہولیات کو بند کردیا ہے۔ آیوشمان بھارت صحت اسکیم کے دائرے میں کشمیر صوبے میں 40 نجی اسپتال اور 90 ڈائلیسز سینٹرز کام کر رہے ہیں جب کہ صوبۂ جموں کے 53 نجی اسپتال اور 13 ڈائلیسز مراکز گولڈن کارڈ کے تحت مفت طبی سہولیات فراہم کر رہے ہیں۔

کشمیر صوبے کی نجی اسپتال ایسوسی ایشن کے مطابق مفت علاج کو لے کر مسائل، انشورنس کمپنی ایفکو ٹوکیو کے باہر نکلنے سے پیدا ہوئے ہیں۔ 

قابل ذکر ہے کہ گزشتہ برس اکتوبر میں احتجاج کے بعد حکومت کی جانب سے 50 سے 60 فیصد رقومات کو فراہم کیا گیا اور کام کو آگے جاری رکھنے کا کہا گیا تھا لیکن انہوں نے کہا کہ ہمیں سرکار کے ساتھ معاہدے کی تجدید ہر تین سال کے بعد کرنا ہوتی ہے لیکن اس بار ابھی تک معاہدے میں کوئی توسیع نہیں کی گئی اور نہ اس بارے میں کوئی بات کی جا رہی ہے۔