سید حسن نصر اللہ کی تشییع جنازہ، دنیا بھر سے لاکھوں کی تعداد میں اہم شخصیات کی شرکت

بیروت: آج 23 فروری 2025 بروز اتوار، حزب اللہ کے جنرل سیکریٹری سید حسن نصر اللہ اور ان کے جانشین سید ہاشم صفی الدین کی لبنان کے شہر بیروت میں تشییع جنازہ کی جارہی ہے جس میں دنیا بھر سے لاکھوں کی تعداد میں اہم شخصیات نے شرکت کی۔

سن رائز نیوز ایجنسی کی رپورٹ کے مطابق لبنانی شہری حزب اللہ کے پرچم اٹھائے ہوئے شمعون اسٹیڈیم کی طرف رواں دواں ہیں، عوام مقاومت کی حمایت اور صہیونی حکومت کے خلاف نعرے لگا رہے ہیں۔

لبنان کے دارالحکومت بیروت کے کمیل شمعون اسٹیڈیم میں سید مقاومت شہید حسن نصراللہ اور شہید ہاشم صفی الدین کی تشییع جنازہ جاری ہے۔

لبنانی عوام اور دیگر ممالک سے تعلق رکھنے والے مقاومت کے حامیوں کا سمندر بیروت کی سڑکوں پر امڈ آیا ہے۔

دوسری جانب سوشل میڈیا کے صارفین نے ایک ویڈیو شائع کی ہے جس میں سید حسن نصر اللہ کی نماز جنازہ میں لبنانی شہریوں کو شرکت سے روکنے کے لئے صیہونی رژیم کے حربوں کو دکھایا گیا ہے۔ 

اس تصویر میں صیہونی رژیم کے جعلی جھنڈے والے ایک صارف اکاؤنٹ نے لبنانی شہریوں کو انتباہی پیغام بھیجا ہے، جس پیغام میں کہا گیا ہے: لبنانی شہری، جنازے کی تقریب میں شریک نہ ہوں، نہ آپ اور نہ ہی آپ کے بچے؛ بصورت دیگر، ہم تم پر نظر رکھیں گے لیکن اس دھمکی آمیز پیغام کے باوجود بھی آج صبح سے ہی لوگوں کا سیلاب شمعون اسٹیڈیم کی طرف بڑھ رہا ہے جو سید حسن نصر اللہ اور دیگر شہداء کی تصاویر کے ساتھ بیروت کی سڑکوں پر نظر آرہے ہیں۔

واضح رہے کہ سنہ 2000ء میں مختلف آپریشنز کے ذریعے جنوبی لبنان کو اسرائیل سے آزاد کرانے اور 2006ء کی اسرائیل کے ساتھ 33 روزہ جنگ میں حزب اللہ لبنان کی کامیابی کی وجہ سے انہیں "سید مقاومت"(مزاحمتی بلاک کے سردار) کا لقب دیا گیا۔ اسی طرح اسرائیل کے خلاف مزاحمت اور متعدد فتوحات کی وجہ سے سید حسن نصر اللہ عرب اور اسلامی دنیا میں مقبول ترین شخصیت، نیزعرب دنیا اور مشرق وسطیٰ میں سب سے طاقتور رہنما کے طور مشہور ہوئے۔

قابل ذکر ہے کہ سید حسن نصر اللہ 27 ستمبر سنہ 2024ء بروز جمعہ جنوبی لبنان کے ضاحیہ نامی شہر پر اسرائیل کی جانب سے کیے گئے راکٹ حملے میں شہید ہوگئے تھے، ان کی شہادت کے بعد دنیا کی مختلف شخصیات نے رد عمل ظاہر کرتے ہوئے اپنے تاثرات بیان کیے۔ 

Follow us on facebook: 

https://www.facebook.com/share/1BiA52gPbH/