بھارت میں ایرانی سپریم لیڈر کے نمائندے کی 15 سالہ خدمات کو خراج تحسین، ملک بھر کے علماء نے شرکت کی

نئی دہلی: ایران کلچر ہاؤس نئی دہلی میں ایک شاندار تقریب کا انعقاد کیا گیا جس میں بھارت میں ایرانی سپریم لیڈر آیت اللہ خامنہ ای کے سابق نمائندے حجۃ الاسلام والمسلمین الحاج مہدی مہدوی پور کی پندرہ سالہ درخشاں خدمات کو خراج تحسین پیش کیا گیا اور ان کی جگہ آنے والے نئے نمائندے حجۃ الاسلام والمسلمین ڈاکٹر عبد المجید حکیم الہٰی کا شاندار استقبال کیا گیا اس تقریب میں ملک بھر کے علماء اور سماجی شخصیات نے شرکت کی اور ایرانی سپریم لیڈر کے ساتھ اپنی عقیدت کا اظہار کیا۔

سن رائز نیوز ایجنسی کی رپورٹ کے مطابق اس پروگرام کا آغاز قرآن کی تلاوت سے ہوا جس کے بعد آیت اللہ خامنہ ای کے نمائندے حجت الاسلام و المسلمین مہدوی پور نے تمام ملک بھر سے آنے والے مہمانوں کا شکریہ ادا کیا۔

انہوں نے اپنے خطاب میں کہا کہ انہوں نے تقریباً پندرہ سالوں تک ہندوستان میں بطور آیت اللہ خامنہ ای کے نمائندے خدمت انجام دی اور اس عظیم ذمہ داری کے لیے وہ دل سے شکر گزار ہیں۔ 

انہوں نے مزید کہا کہ ان سالوں میں ہندوستان کے مختلف حصوں کا دورہ کیا اور یہاں کے لوگوں میں صرف محبت، بھائی چارہ اور اتحاد دیکھا، ان کی کوشش ہمیشہ یہی رہی کہ لوگوں کو ایک دوسرے کے قریب لایا جائے اور تمام اختلافات کو کم کیا جائے۔

اس تقریب میں ایران کے سفیر ایرج الٰہی نے بھی شرکت کی اور اپنے بیان میں مہدوی پور کی محنت، خدمات اور لوگوں کو جوڑنے کی کوششوں کی دل سے تعریف کی۔ 

انہوں نے کہا کہ مہدی پور صاحب نے ہندوستان میں صرف سفارتکاری نہیں کی بلکہ مذہبی اور ثقافتی تعلقات کو بھی مضبوط کیا ہے۔

دوسری جانب آیت اللہ خامنہ ای کے نئے نمائندے جناب حکیم الہٰی نے بھی تقریب میں موجود افراد سے خطاب کرتے ہوئے کہا کہ وہ اللہ کے شکر گزار ہیں اور جناب مہدی پور کی محنت کو سراہتے ہیں۔ انہوں نے کہا کہ ان کی کوشش ہوگی کہ وہ ہندوستان میں دینی، تعلیمی اور ثقافتی سرگرمیوں کو مزید بڑھائیں۔

اس تقریب میں کویت سے آئے مہمان جناب مصطفی غلام نے بھی اپنے خیالات کا اظہار کیا اور کہا کہ جناب مہدی پور نے ہر کمیونٹی اور طبقے کے ساتھ مل کر کام کیا اور لوگوں کے درمیان محبت اور اتحاد بڑھایا۔

واضح رہے کہ اس تقریب میں آیت اللہ خامنہ ای کے دفتر برائے بین الاقوامی امور کے معاون، آیت اللہ محسن قمی بھی موجود تھے، انہوں نے بھی جناب مہدی پور کی 15 سالہ خدمات پر روشنی ڈالی اور انہیں دل سے خراجِ تحسین پیش کیا۔ 

انہوں نے کہا کہ جناب مہدی پور نے ہندوستان میں مذہبی، سماجی اور ثقافتی سطح پر بہت اہم کردار ادا کیا اور ان کی بدولت ایران اور ہندوستان کے درمیان علمی اور ثقافتی تعلقات مزید مضبوط ہوئے۔

قابل ذکر ہے کہ جناب مہدوی پور صاحب گزشتہ 15 سالوں سے بھارت میں ایرانی سپریم لیڈر کے نمائندے کے طور پر خدمات انجام دے رہے تھے اور اب ان کی جگہ ایرانی سپریم لیڈر نے جناب حکیم الہی کو بھارت میں اپنا نمائندہ مقرر کیا ہے۔