فاروق عبداللہ کا گولڈن ٹیمپل امرتسر کا دورہ، کہا ہندوستان کسی ایک کا نہیں بلکہ سب کا ہے

نیشنل کانفرنس کے صدر ڈاکٹر فاروق عبداللہ نے گولڈن ٹیمپل امرتسر کا دورہ کیا جس کے بعد انہوں نے صحافیوں سے گفتگو کرتے ہوئے ملک میں اتحاد قائم کرنے پر زور دیا۔

سن رائز نیوز ایجنسی کی رپورٹ کے مطابق ڈاکٹر فاروق عبداللہ نے میڈیا سے گفتگو کرتے ہوئے کہا کہ ہندوستان کسی ایک پارٹی، مذہب یا شخص کا نہیں بلکہ یہ ملک جتنا ہندوؤں کا ہے اتنا ہی مسلمانوں، عیسائیوں اور دیگر مذاہب کے ماننے والوں کا بھی ہے۔

موصولہ اطلاعات کے مطابق انہوں نے جموں کشمیر کے حوالے سے بھی بات کی اور کہا کہ جموں کشمیر کی عوام کے ساتھ بہت بڑا ظلم اور زیادتی کی گئی ہے اور اب وقت آچکا ہے کہ مرکزی حکومت فوری طور پر جموں کشمیر کے ریاستی درجے کو بحال کر کے کشمیری عوام کے ساتھ کیئے گئے وعدے کو پورا کرے۔

واضح رہے کہ 5 اگست 2019 کو بی جے پی کی حکومت نے جموں کشمیر سے آرٹیکل 370 کو منسوخ کر دیا تھا جس کے بعد جموں کشمیر کو آئین ہند کے تحت ملا ہوا خصوصی درجہ ختم ہو گیا تھا اور نیشنل کانفرنس نے اپنے انتخابی منشور میں 370 کی بحالی کے لیے جدو جہد کرنے کا وعدہ کیا تھا لیکن سرکار بنانے کے بعد نیشنل کانفرنس اپنے اس وعدے پر عمل کرنے سے پرہیز کرتی نظر آرہی ہے جس کی وجہ سے جموں کشمیر کی عوام کا اب نیشنل کانفرنس سے بھروسہ ختم ہو رہا ہے۔